«Դարմանթեստ Լաբորատորիս»-ը (ԴԹԼ) հիմնադրվել է 2009-ի հունիսին, Երևանում։ ԴԹԼ-ն կենսահամարժեքության և դեղակինետիկայի գծով բացառիկ լաբորատորիա է ինչպես Հայաստանում, այնպես էլ ԱՊՀ տարածաշրջանում, քանի որ այն նախագծվել և կառուցվել է միջազգային և ԱՄՆ չափանիշներին համապատասխան։ Լաբորատորիան հագեցած է ջեռուցման, օդափոխության և օդորակման մեկուսացված համակարգով, ջրամատակարարման և անվտանգության համակարգերը հատուկ նախագծվել են այնպես, որպեսզի համապատասխանեն բոլոր միջազգային ստանդարտներին։
ԴԹԼ-ի հիմնական նպատակն ու գործունեությունն է իրականացնել դեղակինետիկայի և կենսահամարժեքության հետազոտություններ` համաձայն GLP (պատշաճ լաբորատոր գործունեություն), GCP (պատշաճ կլինիկական գործունեություն) և GMP (պատշաճ արտադրական գործունեություն) ստանդարտների պահանջների։ ԴԹԼ-ում իրականացվող բոլոր գործընթացների համար մշակվել և ներդրվել են Առողջապահության համաշխարհային կազմակերպության (WHO) և ԱՄՆ-ի Սննդի և դեղերի վարչության (FDA) ուղեցույցների հիման վրա կազմված Գործընթացների ստանդարտ ընթացակարգեր (ԳՍԸ)։
ԴԹԼ-ն հագեցած է նորագույն և ժամանակակից անալիտիկ սարքավորումներով, համակարգիչների ու պահեստային պատճենման բարդ համակարգերով, որոնք թույլ են տալիս իրականացնել փորձաքննություններ` համապատասխան միջազգային պահանջների։
ԴԹԼ-ի անխափան աշխատանքն իրականացվում է բարձր որակավորում ունեցող մասնագետների թիմի կողմից, ովքեր, ի լրումն իրենց ստացած բարձրագույն կրթության, վերապատրաստման դասընթացներ են անցել ԱՄՆ-ում, Եվրոպայում, ինչպես նաև մասնակցել Հայաստանում կազմակերպված որակավորման միջազգային դասընթացների։
ԴԹԼ-ն պահպանում և մշտապես կատարելագործում է լաբորատորիայում անցկացվող փորձաքնությունների որակի հսկողության, անվտանգության, Էթիկայի և գաղտնիության պահպանման բարձր մակարդակը։
