«Լիկվոր» ընկերությունը հիմնվել է 1991-ին և եղել Հայաստանում առաջին դեղ արտադրող ոչ պետական ընկերությունը: «Լիկվոր»-ի արտադրանքը` որպես հիմնական բուժման միջոց, լայնորեն կիրառվում է Հայաստանի առողջապահական համակարգում: Ընկերության տեսականին ներառում է 60-ից ավելի դեղեր: Հիմնականում դրանք ներերակային, ներմկանային ներարկման և ակնաբուժական հեղուկ ստերիլ դեղամիջոցներ են:
«Լիկվոր»-ի արտահանման շուկաներն են Բելառուսը, Մոլդովան, Ղազախստանը, Վրաստանը, Տաջիկստանը և Ղրղզստանը:
Ընկերությունը նոր արտադրամասի շինարարություն է սկսել 2008-ին՝ տեսականին ընդլայնելու և նոր շուկաներ նվաճելու նպատակով:
Ընկերության մեծամասնական բաժնետեր է Վերակառուցման և զարգացման եվրոպական բանկը։
Իր գործունեության առաջին իսկ օրվանից «Լիկվոր»-ն անվերապահորեն հետևում է այն հատուկ պահանջներին, որոնք Առողջապահության համաշխարհային կազմապերպության կողմից ու ԵՄ «Պատշաճ արտադրական գործունեության» (EU GMP) ուղեցույցներով ներկայացվում են դեղամիջոցների արտադրման ու որակի նկատմամբ։
1996-ին «Լիկվոր»-ի արտադրական տարածքները, ինչպես նաև արտադրության ամբողջ գործընթացը վերակազմակերպվել են EU GMP ուղեցույցներին համապատասխան:
Հեղուկ ստերիլ դեղորայքային միջոցների արտադրությունն իրականացվում է ժամանակակից տեխնոլոգիական սարքավորումներով:
«Լիկվոր»-ի որակի վերահսկման համակարգը ներառում է որակի վերահսկման և ապահովման բաժինը, որն իր կազմում ունի լիազորված անձ: Ժամանակակից փորձարարական և մանրէաբանական լաբորատորիաները իրականացնում են խիստ վերահսկողություն ստացվող հումքի, նյութերի և պատրաստի արտադրանքի նկատմամբ:
Տեխնոլոգիական գործընթացի բոլոր կրիտիկական փուլերը, հսկման և անալիտիկ մեթոդները վալիդացվում են:
Ձեռնարկությունում մշակված են որակի ապահովման համակարգի հիմնարար փաստաթղթեր` ԵՄ «Պատշաճ արտադրական գործունեության» ( EU GMP) պահանջներին համապատասխան:
